نفسى فى رئيس

يا إللى مرشح نفسك رئيس
لمصر وعايز تقعد عريس
على كرسى الرياسة ياريت لو نجحت
تصونها وتبقى عليها حريص
ياريت بعناية تختار بطانة
يكون عندها انتماء وأمانة
ما يكونش همها مصالحها الشخصية
وبأد إيه من مناصبها هتطلع كسبانة
ياريت كمان تعين حكومة
تعاملنى كإنسان وتكون مهمومة
بحالى وحال كل الناس
إللى عاشت سنين ف بلدها مظلومة
ياريت تطهر البلد م الفساد
إللى انتشر ف كل حتة فيها وساد
وياريتك تقضى ع الروتين
إللى بقى ف حياتنا شىء معتاد
وياريت تقدملى إقرار بذمتك
م الأول يبينلى ثروة حضرتك
عشان الأمور تكون واضحة من البداية
ونعرف نتحاسب آخر مدتك
ياريت كمان تهتم بالتعليم
وتبدأ من تانى على أساس سليم
تحط مناهج تطلع أجيال
تفيد بلدنا مثقفين
ياريتك تهتم بالصحة
عايز لو جالى حتى دور كحة
ألاقى علاج على أعلى مستوى
وبالحب بلدى أحضانها ليّا فاتحة
ياريت كمان تراقب الأسعار
وتشدد عقوبة الاحتكار
وتزود المرتب اللى يادوب بيكفى
شروة كيلو لحمة وحبة خضار
يا إللى مرشح نفسك رئيس من أولها
لو حاسس إن المسئولية مش هتقدر تشيلها
ياريتك تنسحب من دلوقتى
وتاخد بعضك وتمشى من قصيرها.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *